Göng og brú
Göng og brú er sjálfstætt rekstrar-, fjármögnunar- og eignarhaldsfélag í eigu íslenska ríkisins.
Um okkur
Göng og brú er sjálfstætt rekstrar-, fjármögnunar- og eignarhaldsfélag í eigu íslenska ríkisins. Hlutverk félagsins er að undirbúa, hanna, fjármagna og annast framkvæmd stærri samgöngumannvirkja sem styðja við öruggar, skilvirkar og nútímalegar samgöngur á Íslandi.
Félagið er stofnað á grunni Vaðlaheiðarganga hf. og fer með eignarhald á Vaðlaheiðargöngum og innheimtu veggjalda um þau.
Göng og brú er innheimtuaðili veggjalda og þjónustugjalda í vegakerfinu. Starfsemin hvílir á sjálfbærri fjármögnun: Félagið fjármagnar sig á almennum markaði, án ríkisábyrgðar á lánum og án almennra rekstrarstyrkja.
Með sérhæfðri þekkingu á undirbúningi, fjármögnun og framkvæmd samgönguverkefna vinnur Göng og brú að því að skapa traustan grundvöll fyrir uppbyggingu mikilvægra innviða til framtíðar.
Drifkraftur breytinga
Frá kyrrstöðu til framkvæmda
Af hverju
Að rjúfa kyrrstöðu og skapa raunverulegt hreyfiafl í uppbyggingu stærri samgönguinnviða á Íslandi.
Hvernig
Með langtímafjármögnun utan fjárlaga og heildstæðri nálgun sem tryggir samfellu frá stefnumótun til framkvæmdar.
Hvað
Sjálfstætt innviðafélag sem skipuleggur, fjármagnar og hrindir í framkvæmd stórum arðbærum samgönguverkefnum. Fyrirkomulagið gerir okkur kleift að vinna hratt og með meiri fyrirsjáanleika.
Fréttir
Göng og brú ohf. hefur ráðið Guðmund Daða Rúnarsson í starf forstjóra félagsins.
Göng og brú ohf. hefur ráðið Guðmund Daða Rúnarsson sem forstjóra félagsins. Ákvörðun um ráðninguna var tekin af stjórn félagsins að undangengnu opnu ráðningarferli.
Guðmundur Daði tekur við stjórn félagsins á þeim tímamótum þar sem byggja þarf upp getu félagsins til að taka að sér uppbyggingu innviða sem munu auka öryggi og bæta samgöngur um land allt.
Guðmundur Daði býr yfir víðtækri reynslu af stjórnun, stefnumótun og framkvæmd umfangsmikilla innviðaverkefna. Hann kemur til félagsins frá Isavia þar sem hann starfaði sem framkvæmdastjóri viðskipta og þróunar á Keflavíkurflugvelli. Guðmundur Daði sinnti fjölbreyttum stjórnunarstörfum hjá Isavia og leiddi uppbyggingu og framkvæmdir flugvallarins samfleytt frá 2016. Guðmundur Daði er verkfræðingur að mennt frá danska tækniháskólanum í Kaupmannahöfn.
„Ég er þakklátur fyrir traustið og hlakka til að leiða innviðafélagið Göng og brú. Mér líst vel á upplegg ríkisstjórnarinnar um að flýta uppbyggingu á stærri samgönguinnviðum með þessum hætti. Þá tel ég að reynsla mín frá Isavia af því að leiða uppbyggingu innviða og ljúka framkvæmdum á réttum tíma, og á kostnaðaráætlun, muni nýtast vel á þessum nýja vettvangi,“ segir Guðmundur Daði Rúnarsson nýráðinn forstjóri Ganga og brúar.
„Við hefjum leika strax í næstu viku með kynningar- og markaðsdegi Ganga og brúar þar sem verða fulltrúar fjölda erlendra og innlendra aðila. Ég veit að það er mikill áhugi á verkefnum félagsins og við förum hratt af stað.“
